نظام آباد میں لڑکے اور لڑکیوں کیلے ریسیڈینشل اسکول(اقامتی اسکول) کا قیام

*** حکومت تلنگانہ‘ اقلیتی مالیاتی کارپوریشن کے تحت سال 2016-17 کیلئے ضلع نظام آباد میں لڑکے اور لڑکیوں کیلے ریسیڈینشل اسکول(اقامتی اسکول) کا قیام عمل میں لایا جارہا ہے۔ ایگزیکٹیو ڈائرکٹر اقلیتی مالیاتی کارپوریشن نظام آباد پریم کمار نے اپنے جاری کردہ ایک پریس نوٹ میں بتایاکہ ضلع نظام آباد کے پانچ اسمبلی حلقوں میں ریسیڈینشل اسکولس کی سہولت دستیاب ہے۔ حکومت کی جانب سے ضلع نظام آباد کے لڑکوں کیلئے آرمور‘ بانسواڑہ‘ یلاریڈی اور نظام آباد مستقر پر ہاسٹلس کی منظوری عمل میں آئی ہے جبکہ حلقہ اسمبلی بودھن میں لڑکیوں کیلئے ہاسٹل کی منظوری عمل میں آئی ہے۔ انہوں نے بتایاکہ ان ریسیڈینشل اسکولس میں سال 2016-17 سے تعلیم کا آغاز ہوگا۔ اس



کیلئے مندرجہ بالا مقامات پر کرایہ کی عمارت درکار ہے۔ جس کی لیز کی مدت 3 سال ہوگی۔ بلڈنگ کا رقبہ 7000فٹ یا 25000 اسکوائر فٹ ہونا چاہئے۔ بلڈنگ G+2 اور نئی تعمیر شدہ ہو۔ عمارت کے اطراف باونڈری وال‘ پینے کے پانی کی سہولت‘ پرامن ماحول میں کشادہ کمرے اور باتھ رومس اور ٹائلٹس ہوں۔ ڈرینج کا بہترنظام ہو۔ آفس اسٹاف اور وزیٹرس کیلئے پارکنگ کی سہولت ہو۔ ریسیڈینشل اسکول بلڈنگ شہری علاقوں سے کچھ دوری پر اور مین روڈ سے قریب واقع ہونا چاہئے۔ کرایہ کی عمارت و بلڈنگ کیلئے درخواست فارم ای ڈی مائناریٹی فینانس کارپوریشن دفتر واقع سبھاش نگر پر دستیاب ہیں۔ مکمل کی ہوئی درخواست 29؍فروری 2016ء تک داخل کرسکتے ہیں۔ مزید تفصیلات کیلئے 08462-238826 پر ربط پیدا کریں۔